పర్యావరణ ధ్వంసకమయ్యే - కేవలం ఒక్కసారికే పనికి వచ్చే ప్లాస్టిక్కులు ఇంకా వాడాలా!

2861^* వ వేకువ సమయపు శ్రమ వివరాలు!

          బుధవారం (23.8.2023) బ్రహ్మకాలంలో 4.18 కే అవి మొదలై, 6.09 దాక సంభవించాయి! ఊరి వీధుల సుస్థితి నిమిత్తం సదరు శ్రమకారులు 22 మంది! మెరుగులు దిద్దుకొన్నచోటు మళ్లీ గంగులపాలెం మురుగు కాల్వ వంతెన దగ్గరే! - ప్రధానంగా బాటకు ఉత్తర దిశగానే!

          ఏ రోజుకారోజు తమ ఇంటినీ, పరిసరాల్నీ శుభ్రపరచుకోవడంలో బద్దకించే వాళ్లను చూశాం; అసలు ఉదయం 7-8 గంటలైనా మంచాల వంటి పెట్టుకొనే వాళ్లనీ చూశాం, అందుకు భిన్నంగా - తమ ఊరూ, వీధీ, ఇల్లూ కాక  మూడు నాలుగు కిలోమీటర్లు ప్రయాణించి, 4.15 కే వీధి పారిశుద్ధ్యానికి దిగే ఈ పాతిక ముప్పై మంది కార్యకర్తల్ని తొమ్మిదేళ్లుగా చూస్తూనే ఉన్నాం.

          ఇకపై చూడవలసిందల్లా సగం మంది గ్రామ పౌరుల్లో ఎప్పటికి చురుకుదనం వచ్చి, ఊరంతా తమ ఇల్లుగా భావించి, స్వచ్ఛ శుభ్రతలు పెంచి, ప్రతి వీధినీ నందనంగా మార్చుకొంటారనేదే! ఇప్పటికిప్పుడు కాకున్నా – మరో నవ వసంతాలకైనా అది జరగక తప్పనిదే!

ఇప్పటికైతే :

          శివరాంపురం నుండి - కోమలా నగర్ అటు చివర్నుండి - విజయ నగర్ నుండి (అందరూ వయోధికులే) ఇటు మూలన – బందరు ఉపమార్గం దాక వేకువనే వచ్చి, కత్తీ, గోర్రూ, చీపుర్లూ పట్టి ఊరి అందానికి పాటుబడుతున్న రమణీయ దృశ్యాలే నన్ను ఆకట్టుకున్నవి!

          ఇంటి బాధ్యతలతో సరిపెట్టుకోక - ఉద్యోగ విధుల్తో సంతృప్తిపడక - స్వార్ధ భావనలకు చెల్లు చీటీలు వ్రాసి సామాజిక భావనల్ని ప్రోదిచేస్తున్న గృహిణుల్నీ, గత/ ప్రస్తుత ఉద్యోగుల్ని చూస్తే ఉత్తేజం కలగకేంచేస్తుంది?

          ఏనాటి శ్రమ జీవన సౌందర్యం ఆనాటిదే గాని - ఏ పూట వీధి మెరుగుదల సంతృప్తి ఆపూటదే గాని - అవన్నీ కార్యకర్తలకు దైనందిన అనుభవ వేద్యాలే గాని. ఈ దారిన వచ్చే - వెళ్లే గ్రామస్తులు కొన్ని నిముషాలు నిదానించి, ఈ నాటి గంగులవారిపాలెం – బండ్రేవుకోడు కాల్వ గట్టు వీధి పచ్చదనాన్నీ, పరిశుభ్రతనీ, పూల వైభవాన్ని చూసి - అదెలా సాధ్యపడిందో గుర్తిస్తే చల్లపల్లికి మరిన్ని మంచిరోజులు వచ్చినట్లే! – ఎదురుచూద్దాం!

కొంచెం ఎక్కువ సమయమే తీసుకొన్న సమీక్షా సమావేశంలో:

- చాల రోజుల ఎడం తరువాత వచ్చి, కార్యకర్తల్తో కలిసిన B.D.రాంప్రసాద్ ప్రకటించిన స్వచ్ఛ సుందరోద్యమ నినాదాలూ,

- తిరుచ్చిలో తమిళ సాంప్రదాయక వైవాహిక వివరాలు,

- DRK సహాధ్యాయి Drహమీద్ గారి, మరొక అజ్ఞాత దాతృత్వ సంగతులూ

          రేపటి వేకువ కూడ మన శ్రమదాన క్షేత్రం ఇదే గంగులవారిపాలెం వంతెన వద్దనే!

          ప్రజ్వలించు నవ సంస్కృతి

శ్రమదానమె తప్పయితే – గ్రామానికి కీడయితే –

లవలేశం ప్రయోజనం రాని వెర్రి చేష్టయితే -

ఈ విజ్ఞులు తొమ్మిదేళ్లు ఎలా చేయగల్గుతారు?

ప్రజ్వలించు నవ సంస్కృతి బాటను నిర్మించగలరు?

- ఒక సీనియర్ స్వచ్ఛ కార్యకర్త,

   23.08.2023.