ఒక్కసారికి మాత్రమే పనికివచ్చే ఏ ప్లాస్టిక్ వస్తువులనూ వాడం!  

స్వచ్ఛ సుందర చల్లపల్లి ఉద్యమం –1949^* వ నాటి కొన్ని ఉద్వేగ క్షణాలు.

 యథా ప్రకారం ఈ వేకువన కూడ 4.03 నుండి గ్రామంలో కనీసం 3 చోట్ల నడిచిన స్వచ్చంద శ్రమదాన వేడుక 6.30 కు ముగిసింది. శ్రమదాతలు 30 మంది, శ్రమల లబ్ది చోట్లు- శివరామపురం దారిలో పంట కాల్వ సమీపం, కమ్యూనిస్టు వీధి వగైరాలు.

 నేనొక స్వచ్చ చల్లపల్లి కార్యకర్తగా కాక- మధ్యస్తుడుగా-తటస్తుడుగా నిలిచి, ఇంత వేకువ-వేల-దినాలుగా జరుగుతున్న ఈ నిస్వార్ధ శ్రమదాతలను పరిశీలించి చూస్తుంటే- ఈ గ్రామం పురాణ కాలం నాటి తపో వనమో, ఈ పుణ్యాత్ములు అలనాటి ఏ భగ్న తాపసులో... అనిపిస్తున్నది. అలా కానప్పుడు వీళ్లకు ఈ చెత్త-మురుగు-దుమ్ముల గ్రామ సేవలెందుకు? ఒడలు వంచి, నిత్యం ఈ చెమట దారలెందుకు?

- శివరామపురం మార్గంలో ఇరువైపుల మళ్లీ వందల కొద్దీ ఖాళీ మద్యం సీసాలు, పెద్ద ట్రక్కు నిండ రకరకాల గడ్డి-గాదం- కొమ్మ-రెమ్మలు, మొలకెత్తిన తాడి కాయలు వంటి వన్నీ తొలగి, పని జరిగిన మేర శుభ్రంగా- జరగవలసినది భిన్నంగా కనిపిస్తున్నవి.

- సుందరీకర్తల చేతిలో కమ్యూనిస్టు వీధి ప్రహరీ గోడలు,(కొండొకచో ఇళ్ల గోడలు కూడా!) రంగులు వులుముకొని, అందమైన బొమ్మలు ప్రత్యక్షమై చూపరుల నయన మనోహరాలైపోతున్నవి.

- ఒక పెద్ద ట్రక్కు నుండి ఒలికిన కాంక్రీటు మిశ్రమాన్ని కష్టపడి సేకరించి, బైపాస్ దారిలోను, సంత వీధిలోను గుంటలను పూడ్చిన గ్రామ రక్షక దళాన్ని చాలామంది గమనించారు గాని, సముచిత స్పందనలు మాత్రం లేవు!

- వేకువ సమయంలోనే గ్రామంలో కార్యకర్తలు నాటి, సాకి, పెంచిన వేలాది చెట్లకు ట్రస్టు ఉద్యోగ మిత్రులు జలధారలందిస్తున్నారు!

6.40 సమయంలో స్వచ్చ వేడుక ముగింపు కాలంలో జరిగిన శ్రమ దాన సమీక్ష – ప్రశంసా సమావేశంలో:

 మాలెంపాటి అంజయ్య గారు మూడు సార్లు గ్రామ స్వచ్చ-సుందర సంకల్ప నినాదాలతో వీధిని హోరెత్తించగా, “ పాడుదమా స్వేచ్చా గీతం ఎగురేయుదమా జాతి పతాకం....” అంటూ నందేటి శ్రీనివాసుడు చాలామంది చెవుల, మనస్సుల తుప్పు దులిపాడు.

రేపటి శ్రమదాన ఉదంతం కూడ పెదకళ్లేపల్లి దారిలోనే!

         ఆ విజయ రహస్యం ఇది.

స్వచ్చ-శుభ్ర చల్లపల్లి విజయ రహస్యంబేదన....

సామాజిక ఋణం తీర్చు సద్భావనతో కొందరు...

దాతల సౌజన్యంతో మరు భూములు, కాల్వ గట్లు

మనోహరాకృతులు తీర్చి మైమరపించేయడం!

నల్లూరి రామారావు

స్వచ్చ చల్లపల్లి కార్యకర్త,

సభ్యులు - మనకోసం మనం ట్రస్టు,

శుక్రవారం – 13/03/2020

చల్లపల్లి.