ఒకసారి వాడి పారేసే ప్లాస్టిక్ వస్తువులు వద్దని చాటుదాం – మానవాళి మనుగడకు ఆధారమైన పర్యావరణాన్ని కాపాడుదాం.

అదే వడ్ల మిల్లు వీధి – 32 మందితో జరిగిన పారిశుద్ధ్యం @ 3461^*

          తీరింది – శుక్రవారం (02.05.25) వేకువ 4.10-6.10 సమయాల నడుమ స్మార్ట్ బజారు సేవా రుణమే గాని- చల్లపల్లి గ్రామ ఋణం కాదు! కనీసం ఏడెనిమిది నాళ్లుగా  పూనుకొన్న బందరు బజారు బాకీ కాదు!

          NH 216 కు చెందిన, 6 వ నంబరు కాలవకు సంబంధించిన పారిశుద్ధ్యమైతే గదా – చప్పున ముగియడానికి! అక్కడక్కడ మినీ ఉద్యనాలుంటాయి. 3 అడ్డ రోడ్లు – సజ్జా, మునసబు, భారత లక్ష్మి మర వీధులు కూడ ఈ కార్యకర్తల కోసం కాచుకుని ఉంటుంటే – ప్రధాన వీధి మెరుగుదల ఆలస్యం కాకేం చేస్తుంది!

          ఆలస్యమైతే కానీ- గ్రామ ముఖ్య వీధుల  బాగు కోసం కార్యకర్తలూ, కార్యకర్తల కోసం ఆ వీధులూ 365 రోజులూ ఉండేవే కదా! ఈ అడ్డ బాట లోని సకల కశ్మలాలనూ, డ్రైన్ వ్యర్దాలనూ, బైపాస్ రోడ్డు దాక స్వచ్చ కార్యకర్తలు సముద్ధరించామనే సంపూర్ణ సంతృప్తి పొందారు గదా!

          ఈ పూట ఆరగంటలో ముగించగలమనుకొనే ఈ చిన్న వీధి  శుభ్ర సౌందర్యాలు 6.10 దాక 2 గంటలు పట్టిన కారణమే మనుకొంటిరి? మిల్లు గేటు ఎదుటి సిమెంటు రోడ్డు కాంట్రాక్టరు మహాశయుడు  దాని నిర్మాణ  అవశేషాలను ఎక్కడికక్కడ వదిలేయడమూ,  ముఖ్యంగా డ్రైను ఆ వ్యర్థాలతో నిండిపోవడమే !

          ఎన్నెన్ని సీసాలు -  గ్లాసులు - విస్తర్లు గోనె  సంచులు తుక్కును ఆ మురుగు కాల్వ  నుండి లాగేశారో తెలుసా?

          సుందరీకరణ బృందమైతే సగం వీధి ముస్తాబుకే పరిమితమైపోయింది; వాళ్ళ సంతృప్తి వాళ్ళకు మిగిలింది.

నేటి తుది సభా విశేషాలివి:

1) కర్ణాటక నుండి 86 ఏళ్ల స్వచ్చ కార్యకర్త వేమూరి అర్జునుల వారు ఫోనులో స్వచ్చంద శ్రమదాన విశేషాలు తెలుసుకొనుట,

2) కాశీ యాత్రలో కాలు విరిగిన గురవయ్య ఆ కట్టుతోనే వచ్చి శ్రమదానంలో వేలు పెట్టుట, సూక్తులందుకొనుట!

3) నాగాయలంక నుండి పొన్నూరు శ్రీ రామ మూర్తి గారి పేర బాల భారతి గారు 5000/ నగదు దేసు మాధురి ద్వారా అందించుట, మాధురి గారు కూడా తన రేపటి వైవాహిక స్ఫురణగా – ముందస్తుగా ఈ పూటనే 1000/- DRK గారికి అందించుట,

          రేపటి కార్యక్రమం కోసం తూర్పు రామ మందిరం ఎదుట కలవాలని నిర్ణయించుట !.... వగైరాలు!

         ఆ మహనీయుల బాటలొ

లక్షల సంవత్సరాల విలక్షణమగు సమాజాని

కెవరు రంగు- హంగులద్ది – ఎన్నో తప్పుల్ని దిద్ది-

స్వస్త పరచి – మెరుగు పరచి – సక్రమముగ నడిపారో

ఆ మహనీయుల బాటలొ స్వచ్చోద్యమ కారులిపుడు!

- నల్లూరి రామారావు

  02 .05.2025.