ఒక్కసారికి మాత్రమే పనికివచ్చే ప్లాస్టిక్ వస్తువులను వాడవద్దు.

స్వచ్ఛ సుందర చల్లపల్లి ఉద్యమం – 2003^* (రెండు వేల) వ నాటి ప్రాభాత శ్రమదానం 

          ఈ నాటి వేకువ 4.00 - 6.05 సమయాల మధ్య యధావిదిగా – నిరాటంకంగా జరిగిన గ్రామ బాధ్యతా నిర్వహణంలో భాగస్వాములు 29 మంది. శ్రమాదాన లబ్ది చల్లపల్లిలోని రెండు – మూడు ప్రాంతాలకు -  గంగులవారిపాలెం బాటలో, బందరు రహదారిలో, మొక్కలకు నీరందవలసిన మరికొన్ని వీధులలో!

          మొన్నటి ఉదయం ఒక కార్యకర్త ఛలోక్తిగా అన్నాడు – “ఇది మన 2001 వ రోజు కాదయ్యా, ఒకటవరోజు” అని! “రెండువేల రోజులు – సుదీర్ఘ సేవలు....” ఇలాంటి వన్నీ వదిలేసి, మొదటి రోజు దీక్ష – వినయం – పట్టుదల – ప్రణాళికలతోనే నడుద్దాం..” అని కాబోలు అతని ఉద్దేశం! అతి సన్నిహితంగా ఇన్నేళ్ళుగా కార్యకర్తల అంకితభావాన్ని, కృషి వైవిధ్యాన్ని గమనిస్తున్న నాలో ఎన్నో ప్రశ్నలు, వాటికి సమాధానాలు కూడ తడుతుంటాయి. ప్రశ్నేమంటే – “ఈ ఆరేళ్ళ స్వచ్చోద్యమంలో ఈ నిష్కామ కర్మ వీరులు చల్లపల్లికి చేయకుండా వదిలేసిన సేవలేమిటి?” అని! ఊరిలో 10 ప్రాంతాలలో బహిరంగ విసర్జిత మలమూత్రాలు, చచ్చిన, కుళ్లిన జంతు కళేబరాలు వంటి వన్నీ తమ చేతులతో ఎత్తలేదా? చీపురు పట్టి రోడ్డెక్కి, లాగు – చొక్కాలు విప్పి మురుగు కాల్వలో దిగిన వాళ్ళకు ఈ పని – ఆ పని అనే విచక్షణ ఏముంటుంది? ఇక నేటి శ్రమదాన విషయానికొస్తే –

 1) రెస్క్యూ టీమ్ వారు బండ్రేవు కోడు గట్టుకు, అక్కడి చెట్లకు, తారు రోడ్డుకు గత వారం నాళ్ళుగా కల్పించుకొనదలచిన  రక్షణ పూర్తి చేశారు.

 2) ఏడెనిమిది మంది దారిమలుపు లోని చిక్కు కంపనీ, ముళ్ళ చెట్ల కంపనీ, ప్రైవేటు స్థలాన్నీ తమ ఊహలకనుగుణంగా అందంగా రూపొందిచారు.

 3) ఆరేడుగురు బందరు మార్గ దిశగా పూల మొక్కల పాదుల్నీ, అన్ని రకరకాల కంగాళీలనూ సరిదిద్ది, ఏరి, దారినంతా ఊడ్చి, వరిగడ్డిని పోగులు చేసి, తామనుకొన్న ఆనందాన్ని సాధించుకొన్నారు.

 4) ‘వైజయంతం’ (అమరావతి జమీందారులది) ప్రహరీ మీద సుందరీకరణ బృందం వారు మరిన్ని రంగురంగుల కుడ్య చిత్రాలను తీర్చిదిద్దే పనిలో మునిగారు.

 5) ఇద్దరుఉద్యోగులు వేసవి తాపం తీరే విధంగా ఊరి వీధుల మొక్కలకు నీరు పెడుతున్నారు.

          రేపటి శ్రమదాన సంకల్పంలోనూ మార్పులేదు - గంగులవారిపాలెం రోడ్డు, బందరు జాతీయ రహదారుల ప్రాంతాలలోనే!

          నీరాజన మర్పిస్తా  

ఈర్ష్యాద్వేషాలెరుగక – మద మాత్సర్యాలు లేక

పరుల కొరకు గంటన్నర పాటు బడే స్వచ్చోద్యమ

కారులనే కీర్తిస్తా – ఘనతను విశ్లేషిస్తా!

రెండు వేల నాళ్ళ శ్రమకు నీరాజన మర్పిస్తా!

- నల్లూరి రామారావు

స్వచ్చ సుందర చల్లపల్లి కార్యకర్త మరియు ‘మనకోసం మనం’ ట్రస్టు బాధ్యులు,

బుధవారం – 06/05/2020,
చల్లపల్లి.