పర్యావరణ ధ్వంసకమవుతూ - కేవలం ఒక్కసారికి మాత్రమే పనికి వచ్చే ప్లాస్టిక్కులు వాడనేల?

చల్లపల్లి శ్రమదానం వేడుక చూతము రారండి! - @3139^*

          సోమవారం కనుక ఆ వేడుక రెస్క్యూ కార్యకర్తలది, అది కూడ కేవలం 3+3 = 6 గురిది! అది

1) బందరు జా.ర.దా.కీ

2) గంగులవారిపాలెం రోడ్డుకీ రెండున్నర కిలోమీటర్ల ప్రాంతానికే పరిమితమైనదే!

          తొలుత గస్తీ గది వద్ద 4.20 కే మొదలై, 6.10 కి కాబోలు ముగిసినది! ఐదారుగురు గ్రామ స్వచ్ఛ - శుభ్ర సౌందర్య వ్యసనపరులూ, వాళ్లకు తోడొక ట్రాక్టరూ, ఒక స్కూటరూ, రోడ్డు మరమ్మత్తుకు అవసరమైన పార, పలుగు, డిప్పలూ ముందుగా జాతీయ రహదారి మీద హాజరు!

          అక్కడెవరో వదిలేసిన - వారాల తరబడీ ఎవరూ పట్టించుకోని రద్దూ, దాని మూలంగా రహదారి సౌందర్యానికి లోపమూ! “ఇటు రహదారి అందమూ మెరుగవ్వాలి - అటు గంగులవారిపాలెం వీధి మార్జిన్ గుంటలు పూడి, రోడ్డు మన్నికా పెరగాలి” అనే ఉభయతారక ఆశయంతో కార్యకర్తలు చేసిన కష్టం ఫలించింది. రెండు మూడొందల గజాల బారునా – వీధి మార్జిన్లు బలపడినవి!

          ముఖ్యంగా కొలిం మేస్త్రీ అనబడే దాసరి పూర్ణచంద్రరావు గారి పాల ఉత్పత్తి కేంద్రం దగ్గరా, బండ్రేవు కోడు కాలువ దగ్గరి మలుపులోనూ ఈ రోడ్డు ఇంకొన్నేళ్లు భద్రంగా ఉంటుందనే నమ్మకం కలిగింది! ఆ మాత్రం తృప్తి చాలు స్వచ్ఛ కార్యకర్తలకి!

          ఈ 6 గురు వాలంటీర్దూ పద్మాభిరామం ఎదుట నిలబడి 6.20 సమయంలో తాము ప్రతినిత్యమూ వల్లించే స్వచ్ఛ – సుందరోద్యమ నినాదాలను కస్తూరి శ్రీను నాయకత్వంలో పునరుద్ఘాటించారు!

          కలిసొచ్చే కాలానికి 

వెదకుతున్న ఔషధలత కాలికడ్డు తగిలినట్లు –

కలిసొచ్చే కాలానికి నడిచొచ్చే కొడుకుల వలె -

అదృష్టం జీడి పాకమై తగులుకు వదలనట్లు –

ఈ స్వచ్ఛోద్యమ కారులు ఈ ఊరికి దొరికినట్లే!

- నల్లూరి రామారావు

   03.06.2024