పర్యావరణ ధ్వంసకమవుతూ - కేవలం ఒక్కసారికి మాత్రమే పనికి రాగల ప్లాస్టిక్కులు ఇంకా వాడాలా?

3156^* వ నాటి స్వచ్ఛ కార్యరంగంలో మార్పు!

         శుక్రవారం వేకువ బైపాస్ వీధి నుండి కార్యకర్తల కార్యరంగం బెజవాడ వీధిలోని NTR పార్కు వద్దకు మారింది. కారణం – ‘ప్రపంచ యోగా దిన’ సందర్భంగా అక్కడ జరుగుతున్న యోగా ప్రదర్శన! అది 5.30 – 7.30 నడుమ నూటపాతిక మంది అభ్యాసకులతో - లంకపల్లికి చెందిన శ్రీనివాస గురూజీ ఆధ్వర్యంలో!

         వేకువ 4.26 నుండి 5.35 దాక పెట్రోలు బంకు పరిసరాల్లో 26 మంది శ్రమించడం షరామాములుగానే జరిగింది. నలుగురైదుగురు మహిళలు 3-4 రోజుల్లో అక్కడి దుకాణాల మూలంగానూ, తినుబండారాల బళ్ల వల్లనూ, టీ అంగళ్ళ ఫలితంగానూ వచ్చిన ఆకుల్నీ, పొట్లాల్నీ, దుమ్మూ  - ఇసుకల్నీ ఊడ్వడమొకటీ;

         అడపాదడపా వానల్తో పార్కు వెలుపల - మురుగుకాల్వ గట్ల మీద మళ్ళీ పెరిగిన గడ్డినీ, చేరిన ప్లాస్టిక్ తుక్కునూ ఏడెనిమిది మంది కత్తుల - దంతెల - డిప్పల వారు శుభ్రపరచడాన్నీ;

         గంగరావీ తదితర చెట్ల కొమ్మల్ని డ్రైను వెలుపలి గట్టు మీద నాటిన సంగతినీ,

         - అటు పార్కులోకి మళ్లిన పాదచార బృందమూ, ఇటు యోగా సాధనకు విచ్చేసిన సాధకుల సందోహమూ వీక్షించాయి!

         పార్కు లోపలి కాలిబాటా, ఇతర భాగాల్లో ఏ లోపమూ లేదు - సాధ్యమైనంత శుభ్రంగా ఉన్నవి - కాకపోతే అక్కడక్కడ అర్థం – పర్ధం లేని మొక్కలూ, గడ్డీ పెరగడాన్ని సహించలేక నలుగురైదుగురు కార్యకర్తలు గంటకు పైగా ఒళ్ళొంచి, ఆ చిరు లోపాల్ని సరిదిద్దారు!

         సొంత పని మీద వెళ్తూ కూడ – ఏ రోడ్డెలా ఉన్నది - గుంటలు పడ్డాయా - చెట్లూ, పాదులూ తిన్నగా ఉన్నట్లేనా - ఇంకా ఏం చేస్తే ఈ ఊరి వీధులు మరింత అందంగా ఉంటాయి....... అని ఆలోచించడమూ – తదనుగుణంగా పనులు చేయడమూ ఈ కార్యకర్తల లక్షణాలు మరి

         నేటి స్వచ్ఛ సుందర కార్యకర్తల్లో యోగా ప్రదర్శన చివరి దాక ఎక్కువ మంది పార్కులోనే ఉన్నారు. ప్రతి శని - ఆదివారాల్లో ఈ యోగా శిక్షణ 5.30 - 7.00 ల నడుమ ఇక్కడే జరుగుతుందని ప్రకటించారు.

         శని - ఆదివారాల్లో మన శ్రమదానం హిందూ శ్మశానవాటిక వీధిలోనే జరుగునట!

         సాధ్యమ వేరెక్కడైన?

ఎంతటి ధైర్యం కావలె వీధులూడ్చి శుభ్రపరచ

ఒక దశాబ్ది కాలముగా ఊరి హితం సాధించగ

శ్రమ – ధన - సమయ త్యాగం సాధ్యమ వేరెక్కడైన?

స్వచ్చోద్యమ చల్లపల్లి సాధించిన రికార్టు మరి!

- నల్లూరి రామారావు

  21.06.2024