పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు ఇంకెంత కాలం?

మంగళవారం (10-9-24) నాటి శ్రమానందం 26 మందిది! - @3229^*

            అది వేకువ 4.11-6.10 మధ్యస్తం! చాల మంది బైట వాళ్ళకు నమ్మశక్యం కానివీ, అర్ధం కానివీ స్వచ్చ  కార్యకర్తల పని వేళలే! ఒకటికి నాల్గు మార్లు ప్రత్యక్షంగా చూసి గాని ఇది నిజమని నిర్ధారించుకొంటున్నారు! ఈ పని సమయమే కాదు - వాళ్ల బహిరంగ, అంతరంగిక సమావేశాలు సైతం వేకువ నాల్గు ప్రాంతంలో మొదలై, 6.30 ప్రాంతంలో ముగుస్తుంటాయి! – ఎవరి దైనందిన విధులకూ ఆటంకం కలగకుండా

            పైగా ఈ బ్రాహ్మీముహూర్త శ్రమదానం కార్యకర్తల ఆరోగ్యానికీ మంచిదనే సీనియర్ డాక్టర్ల ఉవాచ! ఆ సమయం వీధి సంచారాలు తక్కువగా ఉండే అనుకూల కాలం కూడ!

            ఈ ఉదయం దాక వరుణుడి జాడ లేదు. చల్లగాలి కూడ కాస్త అణకువగానే వీచింది. మరి ఇలాంటప్పుడే పరిశీలించాలి స్వచ్ఛ కార్యకర్తల శ్రమరీతులు! ఇంతమంచి చల్లని వేళ కూడ ఏడెనిమిది మంది చొక్కాలు చెమటతో తడవడమే కార్యకర్తల కష్టానికి తిరుగులేని సాక్ష్యం!

            ఈ వేకువ కూడ అదుపు తప్పిన మహా వృక్షాలెక్కి కొందరు ఆ కొమ్మల్ని శిక్షించారు. క్రింద పడ్డ కొమ్మల్ని ముక్కలు కొట్టి, గంగులవారిపాలెం వీధి మలుపు ఖాళీ స్థలంలోకి ఈడ్చుకుపోయి, గుట్టగా పేర్చారు.

            అదే సమయమో తెలియదు గాని, ఒక పొడుగైన కార్యకర్త జారిపడిన వదంతి వినిపించింది. ఐతే ఇది నిజం కాకపోవచ్చు - అంత గట్టి పర్యవేక్షక కార్యకర్త పడిపోవడమా?

            ఇన్నేళ్ళ నుండీ దగ్గరగా పరిశీలిస్తున్నా - నాకు ఇప్పటికీ ఆశ్చర్యం కలిగించే విషయమేమంటే – అసలింత మంది వివిధ వర్గాల, సామాజిక నేపధ్యాల, వయోభారాల, శరీర లోపాల, 3 గ్రామాల కార్యకర్తలు 4.30 కాక ముందే - ఏదో ఒక పనిచోటికి చేరుకొని, సామాజిక శ్రమదానం చేసి, సరదా కబుర్లు చెప్పుకొని ఇళ్లకు చేరడం!

ఎన్నోమార్లు నేను ప్రస్తావించినట్లు –

1) మహిళల రోడ్ల ఊడ్పూ,

2) ఏడెనిమిది మంది కత్తుల వారి వీధి మార్జిన్ల గడ్డి చెక్కుడూ,

3) తదేక దీక్షగా ఇద్దరి పూల చెట్ల మితిమీరిన కొమ్మల కత్తిరింపూ వంటి వన్నీ సవివరంగా వ్రాసే అవకాశం లేకనే ఇలా టూకీగా వ్రాస్తున్నాను!

            ఈ నడుమ కొన్నాళ్లు రావడం కుదరని తాతినేని వెంకట రమణుడే ఈ నాటి స్వచ్ఛ సుందరోద్యమ నినాదకర్త!

            ఇదే గంగులవారిపాలెం వీధి వంతెన దగ్గర పనుల కోసం మనం రేపటి రేపు కలువదగిన చోటే – భవఘ్ని నగరానంతర తొలిమలుపు!

            ఇది కేవల స్వయంకృతం

ఇది శత్రువు చెరుపు కాదు – గత జన్మల ఖర్మకాదు –

విదేశాల కుట్ర లేదు - పులుల మీద పుట్రకాదు –

ఇది కేవల స్వయంకృతం - దీన్నాపుట సులభతరం

చల్లపల్లి స్వచ్చోద్యమ మిందుకొక ఉదాహరణం!

- ఒక తలపండిన కార్యకర్త

   10.09.2024