పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు అవసరమా?

వానతో సయ్యాటలుగా - 3265^* వ శ్రమదానం!

         హూణ లెక్కయితే 18-10-24, తెలుగు సాంప్రదాయ ప్రకారమైతే ఆశ్వీజ బహుళ శుక్రవాసరపు వేకువ 4.15-6.10 సమయం.

         2 రోజుల జలుబూ – జ్వరమూ శాంతించి వచ్చిన పార్వతితో సహా 216 వ రహదారి వికారాల మీద పోరు సలుపుతున్న 24 మంది!

         వాళ్లను తడుముతూ, నాలుగైదు మార్లు పరామర్మించిన వానదేవుడూ, దేశంలో ఎక్కడా కనిపించని  సామాజిక - సామూహిక శ్రమదానం చూడాలని మబ్బుల్ని తొలగించుకోలేక అవస్థ పడుతున్న సూర్య భగవానుడూ,

         రోడ్డు ఉత్తరపు లోతట్టున – వరిపొలం ఆనుకొని ఏపుగా పెరుగుతున్న గడ్డినీ, పిచ్చిమొక్కల్నీ తునుమాడుతూ - ఈగలూ, దోమలూ కరుస్తున్నా పట్టించుకోని నలుగురైదారుగురు మహిళా కార్యకర్తలూ,

         దీనికి భిన్న దిశలో వక్రంగా పెరగాలని చూస్తున్న చెట్లను లాగి, త్రాడుతో బిగించి, క్రమశిక్షణ నేర్పుతున్న రైతు ప్రముఖులూ, వృత్తినిపుణులూ,

         అదోరకంగా – నడుమువాల్చి కార్యకర్తలకు మంచి నీళ్లందిస్తున్న వృద్ధాతి వృద్ధుడు,

         “నభూతో..” అనదగిన ఈ స్వచ్ఛ సుందర - శ్రమజీవన దృశ్యాల్ని కెమేరాలో బంధిస్తున్న మరొక వృద్ధ ఛాయా గ్రాహకుడూ,

         ఇంకో పది నిముషాల్లో నిర్ణీత సమయం ముగుస్తుండగా దడదడ-బడబడా-ఎడాపెడా వాయించాలని చూసిన వానగాడూ,

         తానురా వీలు పడక - ఎంత వేకువనో లేచి ఇందరికి అట్ల అల్పాహారం షణ్ముఖునితో పంపిన – వద్దని బ్రతిమాలినా వినని డొక్కా అన్నపూర్ణా,

         తడుంకోకుండా స్వచ్ఛ - సుందరోద్యమ నినాదాలు ప్రకటించిన కళాశాలోపన్యాసకుడు వేముల శ్రీనివాసుడూ,

         రానున్న ఏడెనిమిది రోజుల శ్రమదాన ప్రణాళికను – (చెక్ పోస్టు వారు సహకరిస్తుండగా) వివరించిన DRK వైద్యుడూ,

         శని - ఆదివారాలు మాత్రం NH216 మీదనే శ్రమదానమని అంగీకరించిన అందరూ....!

         అట్టి చిక్కటి నిబద్ధతకే

ఇన్ని ఏళ్ళని హద్దు లేదే, ఇంతవరకని పరిధి లేదే,

వల్లకాడో – మురుగుకాల్వో - బురదగుంటొ వివక్ష లేదే!

గ్రామమునకొక మంచి జరుగుటె కావలెను ఈ కార్యకర్తకు!

అట్టి చిక్కటి నిబద్ధతకే వందనములభివందనమ్ములు  -

- నల్లూరి రామారావు

   18.10.2024