పర్యావరణ ధ్వంసకమవుతూ-కేవలం ఒక్కసారి వాడేసే ప్లాస్టిక్కులు అవసరమా?

మంగళవారం (22-10-2024) శ్రమ విశేషాలు - @3269^*

          అవి విశేషాలనుకొంటే  విశేషాలే! “కాదు – ఈ పెద్ద ఊరినీ, పాతిక వేలమంది జనాన్నీ శతశాతం  మార్చగలమనుకోవడం భ్రమలు” అనుకునేవారికవి భ్రమలే. 

          “భూమి చదునుగా లేదు – గుండ్రంగా ఉన్నది” – అంటే నమ్మారా? ఆ శాస్త్రజ్ఞుడిని శిక్షించారు!

          చెట్టు క్రింద కూర్చొన్న తన మీద యాపిల్ పండు పడితే – “అది భూమి మీదనే ఎందుకు పడ్డది – ఆకాశంలోకి వెళ్ళదెందుకు?” అనే న్యూటన్ ప్రశ్నను వెర్రి ఆలోచనగా కొట్టేశారు గదా!

          “వస్తున్నాయొస్తున్నాయ్  - జగన్నాథ  రథ చక్రాల్ రథ చక్రాల్ – రారండో ! రండో! రండి!..” అని 85 ఏళ్ల వాడు ఒక శ్రీశ్రీ గేయం రాస్తే – “ఇదేం పిచ్చి కవిత్వం” అనుకొన్నాం గదా!

          పదకొండేళ్ల నాడు చల్లపల్లి గంగులవారి పాలెం వీధినీ, పదేళ్ల నాడు చల్లపల్లి మొత్తాన్నీ శుభ్రంచేయాలనీ, హరిత – సుందరీకరణ చేస్తామనీ ఒక గ్రూపు చేసే ప్రయత్నాన్నీ అంతే!

          ఏ రోజుకారోజు బజార్లు శుభ్రపడుతుంటే – 32 వేల మొక్కలు కళ్ల ముందు పెరిగి పుష్పిస్తుంటే – ఇప్పటికీ ఈ శ్రమదానోద్యమం పట్ల నమ్మకం కుదరక – కుదిరినా వచ్చి సహకరించని వారుంటే ఉండవచ్చు మరి!

          దశాబ్దం దాటినా – ఆ నమ్మకాలతో పని లేకుండా – చల్లపల్లిలో స్వచ్చ కార్యకర్తల నిష్కామ కర్మ జరుగుతూనే ఉన్నది.

          ఈ వేకువ 4-16 కే  కనీసం పదిమంది SBI దగ్గరకు చేరుకొని, వాళ్ళ బలం 25 గానూ, శానిటరీ ఇన్స్పెక్టర్  సూర్య ప్రసాదు తదితరులతో తుదకు 30 గానూ తేలింది.

          ఇప్పుడు చూడండి - 6 వ నంబరు కాల్వ పడమటి ఉద్యానం ఎంత చూడ ముచ్చటగా ఉన్నదో – పింగళి మధుసూదన రావు గారి ఆస్పత్రి దాకా బందరు రహదారి ఎంతగా బాగుపడిందో  - బ్యాంకు, జూనియర్ కాలేజీ, అటూ – ఇటూ కలిపి పాతిక దుకాణాల పరిసరాలన్నీ స్వచ్చ – శుభ్ర – సుందరంగా మారినవో!

          నేటి తుది సమావేశంలో నినాదాలు పలికింది S.I. గారు, రేపటి వేకువ చర్యల కోసం మనం కలవదగింది – మునసబు వీధి  ముంగిట్లో!

          స్వచ్చోద్యమ  మనగనేమి?

బ్రహ్మ ముహూర్తాన లేచి, బజార్లలో కసవులూడ్చి,

శ్మశానమున సంచరించి, మురుగుకాల్వ సిల్టు తోడి

ఊరంతటి స్వస్తతకై  ఉరుకులు పరుగులు పెట్టే

స్వచ్చ కార్యకర్తలనెడి పిచ్చివాళ్ల స్వర్గం అది!

- నల్లూరి రామారావు

   ఒక సీనియర్ స్వచ్చ కార్యకర్త

   22.10.2024