గాజు, స్టీలు వస్తువులుండగా సింగిల్ యూజ్ ప్లాస్టిక్ వస్తువులు దండగ!

శ్రమదానానికి మరొక అత్యుత్తమ ఉదాహరణ - @3406^*

అందుక్కారణాలు :

          ఇది శనివారపు (8.3.25) శలవు దినం కావడ మొకటీ, 15 మంది వ్యవసాయ మహిళా కార్మికులూ, ఆరేడుగురి  ZP పాఠశాలా బలగమూ, ఇంకో 6 గురు చిన్నా - పెద్దా వెంకటాపురస్తులూ - అంటే నేటి 53 మంది సామాజిక శ్రమ జీవుల్లో సగంమంది స్థానికులు కావడం రెండోదీ; రహదారి కాలుష్యం మీద తిరుగు బాటు చేసిన వైనం మూడవది !

          మహిళా దినోత్సవ మంచి సందర్భమేమో- నేటి 53 మంది కార్యకర్తల్లో 23 గ్గురు – డ్రైనయి తేనేం, రోడ్డు మార్జిన్లయితే నేం, బరువు డిప్పలు మోసిన కష్టమయితేనేం – మహిళాధిక్యతే కనబడింది!

          ఇప్పటికీ మన పురుషాధిక్య సమాజంలో ఒక్క మారైనా- ఒకానొక ఆదర్శ సామాజిక సేవలో మహిళల డామినేషన్ ఎంత గొప్ప సంగతి!

          ఈ వేకువ పనుల్లో సింహభాగం ప్రాత బాట పగిలిన తారు ముక్కల్ని  ఏరి, డిప్పల కెత్తి, మోసి, క్రొత్త తారు రోడ్డు ప్రక్కపల్లాలు పూడ్చి చిరకాలం మన్నేలా ఆశీర్వదించడమే!  స్త్రీ- బాల కార్మికుల ఈ పవిత్ర మనోగతం తప్పక నెరవేరాలని కోరుకొందాం!

          కత్తులతో నరుకుడుగాళ్లు 2 ముఠాలుగా మారి, ఒక చిన్న బృందం పెద్ద వంతెన దగ్గరి తాటి  చెట్ల సుందరీకరణలో మునగ్గా 2 వ పెద్ద ముఠా రోడ్డు పడమటి డ్రైను వ్యర్థాల అంతు చూసింది!

          వీధి మొత్తాన్ని ఐదారుగురు మహిళలు ఊడ్చేశారు. గంటన్నర తర్వాతనే ప్లాస్టిక్ వ్యర్థాల్ని, గాజు పెంకుల్ని, ప్రాత చెప్పుల్ని ఏరేవాళ్లు 3 గోనె సంచులు నింపి, సంతృప్తి చెందారు!

          వ్యర్థాల లోడింగు లోనూ తలా ఒక చెయ్యేశారు. ఈ పూట కత్తులూ, డిప్పలూ చాల లేదు- ఒక దశలో!

          ఇప్పుడొక ప్రశ్నేమనగా: క్రింది వాళ్లలో ఎవరిది అదృష్టం?

          ఐదారూళ్ల కార్యకర్తలు తమ ఊరి ఆహ్లాదం కోసం వచ్చి, సుమారు 100 పని గంటలు శ్రమిస్తుంటే పట్టని గ్రామస్తులదా-

          పెదకళ్లేపల్లి బాటలో ఉన్నందుకు 5 వారాలుగా నానా  చాకీరీ చేసి, మార్గాన్ని బహు ముఖంగా మెరుగు పరుస్తున్న స్వచ్చ కార్యకర్తలదా –

          మినప చేలో 10 నిముషాల పాటు జరిగిన సమీక్షా సభను చూసి తీరాలి!  “ఎక్కడమ్మా నీవు లేనిదీ - ఏమిటీ నువు చేయిలేనిదీ ..” అంటూ మహిళా చైతన్యాన్ని ఉసి గొలిపే నందేటి శ్రీను గళమూ, అ గానలాహిరికి ఆనందిస్తున్న స్త్రైణమూ ..,

          ఈ  శ్రమానంతర సన్నివేశాన్ని రెప్ప వేయక చూసి ఆనందిస్తున్న స్వచ్చోద్యమ సారథి మొదలైన నలుగురైదుగురమూ,

          ఇది గాక, చెక్ పోస్ట్ వెంకటేశ్వరుల వారు తన నెల వారీ 520/- చందాను DRK గారికి సంతోషంగా ఇచ్చుకొన్నారు. 

          రేపటి శ్రమ కూడ వెంకటాపురంలోనే!

           అదో వెర్రి ఆవేశము

అదో వెర్రి ఆవేశము అంతమంది స్త్రీ పురుషులు

మురుగు కంపు-డంపు కంపు ముక్కులదర కొడుతుండగ

వంతెన కడ కళేబరాల వాసనలను భరిస్తూ

గంటన్నర పైగా తమ కష్టం ధారపోయడం!

- నల్లూరి రామారావు

   08.03.2025