ఒక్కసారికి మాత్రమే పనికివచ్చే ప్లాస్టిక్ వస్తువులను వేటినీ వాడం!

స్వచ్ఛ సుందర చల్లపల్లి ఉద్యమం – 1886* వ రోజు వార్తలు.  

    ఈ నాటి  వేకువ 4.02-6.20 మధ్య సమయంలో 1 వ వార్డు లో – హిందూ శ్మశాన మార్గంలో 32 మంది శ్రమదాతల గ్రామ బాధ్యతలు విజయవంతంగా జరిగాయి.

22 మందికి పైగా బాధ్యులు ప్రభుత్వ బాలికల వసతి గృహం దగ్గర నుండి శ్మశాన సమీప పంటకాలవ వారధి దాక ప్రణాళికా బద్ధంగా నిర్వహించిన స్వచ్చ-శుభ్ర-సుందరీకరణలో-

- కొందరు కరెంటు తీగల దాక పెరుగుతాయనుకొన్న-తమ చేతే నాటి-పెంచబడిన చెట్ల కొమ్మల్ని ఒక క్రమ పద్ధతిలో నరికి, తిరగేసిన గొడుగుల్లా తీర్చిదిద్దారు. అందుకవసరమైతే చెట్ల పైకి గూడ ఎక్కారు. (ఈ సందర్భంలో ఒక సీనియర్ మౌన కార్యకర్త కాలికి కత్తి గాయమైంది!)

- ఇంకొద్ది మంది కాలువ మురుగు కడ్డు నిలుస్తున్న తుక్కును, ప్లాస్టిక్ సంచుల్ని-బట్టలకు మురుగు అంటుతున్నా లెక్క చేయక- గొర్రులతో బైటకు లాగి, ఊరి మురుగులో చలనం తెచ్చారు. (ఒక సీనియర్ మహిళా కార్యకర్త గంటన్నర పాటు అడ్డ రోడ్డు తూము దగ్గర పది డిప్పల తుక్కు లాగింది!)

- ఇలా పుట్టుకొచ్చిన అన్ని రకాల వ్యర్ధాలను 6.10 తరువాత ట్రాక్టర్ లోకి ఎక్కించి, చెత్త కేంద్రానికి తరలించారు. ఇంత మంది 40-50 పని గంటల తదేక దీక్షతో ఈ రోజు శ్మశాన మార్గము, నాలుగైదు రోజుల నుండి బైపాస్ మార్గము ఎంతగా స్వచ్చ-శుభ్ర-సుందర-సౌకర్యంగా ఉన్నవో మనం వాట్సాప్ లో చూడవచ్చు.

 ఇక సాగర్ టాకీస్ ఉప (బైపాస్) మార్గంలో – విజయ్ నగర్ సమీపంలో సుందరీకరణ యజ్ఞం యధావిధిగా జరిగిపోయింది. మొండి గోడల్ని కూడ వదలక, విద్యుత్ ట్రాన్స్ ఫార్మర్లను సైతం ప్రైమర్లు పూసి, రంగులేసి, పూల బొమ్మలు తీర్చిదిద్ది సుందరీకరించే ఈ పనిలో- డాక్టర్స్, ఉపాధ్యాయులు, వ్యాపారులు చూస్తుండగానే కళాకారులుగా మారుతున్నారు.      

నిన్నటి స్వచ్చ యార్లగడ్డ శత దినోత్సవం ఒక పండుగ వాతావరణంలో విజయవంతంగా జరిగింది.

ఈనాటి స్వచ్చ కృషి సమీక్షా సమావేశంలో పైడిపాముల రాజేంద్ర ముమ్మారు ప్రకటించిన గ్రామ స్వచ్చ-శుభ్ర-సంకల్ప నినాదాలతో 6.45 కు మన గ్రామ బాధ్యతలు ముగియగా....

రేపటి మన తరువాయి కృషి కోసం గంగులవారిపాలెం దారిలో గల మా ఇంటి  దగ్గర కలిసి కొనసాగిద్దాం. అమెరికా లోని తెలుగు సంఘం మాజీ అధ్యక్షులు, ‘ అక్కినేని అంతర్జాతీయ సంస్థ’ వ్యవస్థాపక అధ్యక్షులు శ్రీ తోట కూర ప్రసాద్ గారిని స్వాగతించడానికి అందరం స్వచ్చ యూనిఫాం తో అధిక సంఖ్యలో హాజరౌదాం!

     అందరూ మహానుభావులే.

స్వచ్చంద శ్రమదాతలు-గాయక-కవి-పండితులు-

తాత్వికులు-ఉదాత్తులు-ట్రస్టులోని ఉద్యోగులు-

రాజకీయు-లధికారులు-వృత్తి సంఘ అధినేతలు-

అందరి కలయిక తోనే స్వచ్చోద్యమ కదలికలు!

   నల్లూరి రామారావు

స్వచ్ఛ సుందర చల్లపల్లి కార్యకర్త,

సభ్యులు- మనకోసం మనం ట్రస్టు,

శుక్రవారం – 10/01/2020

చల్లపల్లి.